《驚心動魄兩小時》
星期六下午如常帶Jasmine去美語活動，之後仲去埋玩Baby Shark🦈 搖搖馬及打卡📸。玩到5點就開始去婆婆家，呢個時候我家工人姐姐🧕🏼whatsapp我佢剛剛出門口（因為佢話星期日放假想做埋嘢先，所以自己去婆婆家）
大約6:30pm，佢同其他乘客喺觀塘被巴士司機叫咗落車🤦🏽♀️ 佢落車後立即打俾我，佢話見到好多警察同著黑色衫嘅市民，我第一時間就係叫佢遠離警察👮，因為怕佢有機會食到催淚煙。之後叫佢行相反方向去冇乜人嘅地方，然後搵的士🚕搭。
好可惜佢一架的士都見唔到，而我又好緊張，好怕佢會有事，所以叫佢開whatsapp 分享實時定位俾我，我都係見到佢上咗車先放心少少，8點幾喺婆婆家見到佢先安心❣️
其實我真係有d後悔俾佢自己搭車過婆婆家，不過佢話想去婆婆家一齊食飯，之前佢又試過自己去我先放心，點知就發生呢件事🤦🏽♀️好在有位好心太太幫忙，姐姐跟住呢位太太先可以安全返到，真係好多謝呢位太太呀🙏🏻
當晚即刻教婆婆用whatsapp實時定位呢個function，因為萬一有事上嚟，或者約咗人搵唔到路都會好有用。(雖然香港高樓多定位唔準，但大概位置都唔會差太遠) 大家不妨可以教下身邊老人家🧓或工人姐姐用呀❣️
Search